تأخر تحويل أرباح جوجل أدسنس: الأسباب، الحلول، وتفاصيل مهمة يجب أن تعرفها
كما هو معتاد، في كل شهر وتحديدًا في يوم 22، ينتظر آلاف صناع المحتوى وأصحاب المواقع والمدونات استلام أرباحهم من جوجل أدسنس. لكن هذا الشهر، حدث أمر غير معتاد، وهو أن عدد كبير من الحسابات لم تستلم أرباحها في الموعد، مما تسبب في حالة من القلق والاستفسارات الكثيرة بين المستخدمين:
"ليه الأرباح ما وصلتش؟"
"هل في مشكلة في الحساب؟"
"هل كده خلاص الفلوس راحت؟"
"أتصرف إزاي؟"
في هذا المقال، هنوضح كل التفاصيل المتعلقة بتأخر الدفعات من جوجل أدسنس، وهنجاوب على أهم الأسئلة اللي بتدور في بال صناع المحتوى في الوقت الحالي، بحيث تقدر تعرف هل في فعلاً مشكلة، ولا مجرد تأخير طبيعي.
أولاً: هل فعلاً الأرباح اتأخرت؟
الشهر ده حصل شيء غريب شوية، وهو إن عدد كبير جدًا من المستخدمين - يقدر بنسبة 99% تقريبًا - أرباحهم بالفعل اتحولت من جوجل أدسنس، لكنهم ما استلموش أي رسالة تأكيد على البريد الإلكتروني. وده خلى ناس كتير تفترض إن الأرباح ما اتحولتش، في حين إن الحقيقة إن التحويل تم، بس بدون الإشعار المعتاد.
طيب إزاي تتأكد بنفسك إذا كانت الأرباح اتحولت ولا لأ؟
-
افتح حسابك في جوجل أدسنس.
-
من القائمة الجانبية اختار "الدفعات".
-
بعد كده روح على "معلومات الدفع".
-
هتلاقي في جزء اسمه "حساب الدفعات"، اضغط عليه.
-
لو عندك قناة يوتيوب، اختار مصدر الأرباح "YouTube". لو عندك موقع أو تطبيق اختار "AdSense".
-
اختار العملة "الدولار الأمريكي".
-
راقب الرصيد الظاهر في الحساب.
لو لقيت إن الرصيد بقى صفر، فده معناه إن الدفعه اتحولت بالفعل، حتى لو ما وصلكش إشعار على الإيميل.
ثانياً: ليه الأرباح ما وصلتش للحساب البنكي لحد دلوقتي؟
ببساطة، الدفع من جوجل بيبدأ من يوم 21 ويمتد لحد يوم 26 من كل شهر. فلو أرباحك ما وصلتش يوم 22، ده لا يعني وجود مشكلة، ده طبيعي جدًا.
كمان في عوامل بتأثر على توقيت التحويل البنكي:
-
الإجازات الرسمية: يوم 21 الشهر ده كان إجازة رسمية في البنوك.
-
نهاية الأسبوع: الخميس والجمعة والسبت تعتبر أيام إجازات بنكية في بعض الدول.
-
فترة المعالجة: التحويل البنكي بياخد عادة من 3 إلى 5 أيام عمل عشان يوصل.
بالتالي من الطبيعي جدًا إن الدفعه توصل بداية من الأسبوع اللي بعده.
ثالثاً: حسابي استوفى كل الشروط لكن الدفعة لسه ما اتحولت.. هل في مشكلة؟
لو حسابك في أدسنس مفهوش أي مشاكل، يعني:
-
تم إثبات الهوية.
-
تم تأكيد عنوان السكن.
-
الحساب البنكي مضاف بشكل صحيح.
-
المعلومات الضريبية مكتملة.
وفي نفس الوقت الدفعة ما اتحولتتش، يبقى ببساطة لسه الدور ما جاش عليك في طابور التحويل. الأمور بتمشي بشكل تدريجي ومافيش قلق طالما كل حاجة تمام.
رابعاً: عندي رصيد أعلى من الحد الأدنى لكن الدفعة ما خرجتش
في كتير من الأسئلة بتتكرر كل شهر، زي مثلًا:
"أنا عندي 103 دولار، ليه لسه ما استلمتش أرباحي؟ مش الحد الأدنى 25 دولار؟"
الإجابة ببساطة:
آه الحد الأدنى للسحب هو 25 دولار، لكن ده مش معناه إن الدفعه هتتحول فورًا أول ما توصل للمبلغ ده. لازم كمان تكون الأمور البنكية والضريبية والإدارية كلها مظبوطة، والدفعات بيتم إرسالها حسب الجدول الزمني اللي بيبدأ من يوم 21 لحد يوم 26.
خامساً: هل لو الدفعه ما خرجتش الشهر ده، الفلوس بتضيع؟
لا أبدًا، أرباحك ما بتروحش عليك في أي حال من الأحوال.
لو لأي سبب تقني أو بنكي أو إداري الفلوس ما اتحولتتش الشهر ده، هتترحل تلقائيًا للشهر اللي بعده. وبما إن الفترة الجاية هي بداية تطبيق التحويل على الحسابات البنكية المصرية بالجنيه بدل الدولار، فلو الدفعه ما خرجتش من الحساب الدولاري، هتتحول تلقائيًا للحساب الجديد بالجنيه المصري في الشهر التالي.
سادساً: عندي مشكلة في تأكيد الحساب البنكي المصري.. هل ده السبب؟
بعض الناس أضافت حساب بنكي مصري جديد، لكن لسه ما استلموش مبلغ التحقق (أقل من جنيه) لتأكيد الحساب. وهنا بيظهر تنبيه بيقول إن الحساب غير مؤكد.
السؤال هنا:
هل ده ممكن يمنع استلام الدفعة؟
الواقع بيقول لأ، مش دايمًا. في حالات تم تحويل الأرباح للحساب البنكي القديم بدون أي مشكلة، حتى لو الحساب البنكي المصري لسه مش متأكد.
يعني لو عندك أكتر من حساب بنكي، النظام غالبًا هيحول الفلوس للحساب المؤكد اللي كان شغال قبل كده.
طيب أتصرف إزاي لو أنا قلقان؟
لو حاسس إن الحساب البنكي اللي مش متأكد هو سبب المشكلة، عندك خيارين:
-
تنتظر لحد ما يتم تأكيد الحساب البنكي الجديد، وده ممكن ياخد يومين أو تلاتة.
-
تحذف الحساب البنكي الجديد مؤقتًا وتخلي الحساب القديم شغال، عشان تطمن وتستقبل أرباحك بدون قلق.
القرار في الحالة دي بيرجعلك، حسب راحتك ودرجة القلق اللي عندك.
خلاصة
اللي بيحصل الشهر ده مش مشكلة فردية، ولا هو تأخير غير طبيعي. بالعكس، ده شيء متكرر لكن بسبب إجازات وتغيرات في نظام التحويل، ظهرت الحكاية بشكل أكبر شوية.
اللي لازم تعرفه وتطمن بيه نفسك هو التالي:
-
طالما الحساب سليم والمعلومات مكتملة، فلوسك مضمونة.
-
الدفع بيتم خلال الفترة من 21 إلى 26.
-
تأخر التحويل البنكي لا يعني فقدان الأرباح.
-
عدم وصول رسالة الإيميل لا يعني إن الفلوس ما اتحولتش.
-
في حالة وجود حساب بنكي غير مؤكد، النظام ممكن يلجأ للحساب المؤكد السابق.
شارك تجربتك!
لو لسه ما وصلتش لك أرباحك أو شايف إن في حاجة مختلفة حصلت في حسابك، شارك تجربتك في التعليقات! قولنا:
-
هل تم التحويل من أدسنس ولا لسه؟
-
كام كان رصيدك؟
-
هل الحساب البنكي بتاعك مؤكد ولا لأ؟
مشاركة التجربة هتفيد غيرك وتخلي الكل يطمن إنهم مش لوحدهم. ودايمًا خليك فاكر: الفلوس ما بتروحش، بس ساعات بتتأخر!